Comun di Tor di Zuin / dal Tor (loc.)

Ricercje svelte


< vai al contenuto centrale




Font fotografic de Biblioteche comunâl

Font Biblioteche comunâl, Tor di Zuin, Visite dal President de Republica, 1966

Chest font fotografic, che al cjape dentri 2164 positîfs, al jere conservât e in buine sostance dismenteât intun scjatulon framieç dai materiâi de Biblioteche civiche dal Tor. Il materiâl al cuvierç i agns jenfri il 1938 e il 1995 e al è impuartant pe storie sociâl dal nestri paîs. Par cheste reson al è stât dut digjitalizât in graciis dal jutori di doi lavoradôrs di utilitât sociâl.

Un numar significatîf di fotografiis al rivuarde ativitâts e events leâts ae fabriche: la visite dal president de Republiche taliane Saragat, la costruzion dal stabiliment in Indie e lis viodudis dai boscs indians, viodudis dal Tor dal alt, fotografiis de colonie di Filigare, i varis edificis dal stabiliment, la centrâl termoeletriche, lis centrâls idroeletrichis, il caprolactam, il centri dal lat, il CID. Di cetant interès a son i positîfs che a mostrin la visite di Mussolini e il plastic de place Imperi (vuê place dal Popul).

La part plui significante dal font e je chê su la ativitât politiche e sociâl dal Tor tra il principi dai agns Sessante e il 1995. A son miârs lis personis che si viodin intes fotos di chest font e a son tancj chei che a puedin cjatâ parincj e amîs: fiestis dal anzian, celebrazions dai 4 di Novembar, premiazions sportivis, esibizions de corâl Bepi Avian, mostris di art, la presentazion dal libri sul Tor di Bortolotti, la visite al Comun di bonsignôr Battisti, la fieste de soie cun Gardini, Ferruzzi e l’ambassadôr american, la mostre pai cincuante agns de associazion di balon SAICI-Torviscosa, la scree des scuelis elementârs dal Villaggio Roma (1961), la situazion urbanistiche e edilizie dal borc intal 1980, i auguris di Nadâl tra i dipendents dal Comun, la presentazion dal progjet dal “Tubon”, la scree dal tombâl dedicât a Marinotti, la situazion des pissinis tor de metât dai agns Otante, assembleis publichis, innomenâts ospits politics, la scree dal centri sociâl, la presentazion dal cine sul Tor, la descrizion des architeturis dal Tor vie pe metât dai agns Otante, la visite di une delegazion di partigjans de Division Garibaldi, la scree des cjasis IACP di vie Marconi, i fruts des scuelis elementârs di Malisane che a puartin rosis su lis tombis dai militârs de Austrie Ongjarie, cjasis comunâls, fiestis di cuarps militârs, omaçs ai partigjans copâts, la scree dal cjamp di tennis dal Villaggio Roma, la scree dal sorepàs feroviari.