Comun di Tor di Zuin / dal Tor (loc.)

Ricercje svelte


< vai al contenuto centrale




Font ex Caffaro

Font ex Caffaro, Tor di Zuin: interni dal teatri, Delegazions talianis e todescjis in ocasion dal radopli dal stabiliment, 21 di Setembar dal 1941

Vie pal Setembar dal 2010 la Aministrazion Comunâl dal Tor e à domandât ae Sorintendence archivistiche dal Friûl - Vignesie Julie di meti sot de tutele l’archivi storic di proprietât de Caffaro Chimica Srl in A.S., de Caffaro Srl in A.S. e de associazion Primi di Torviscosa. Doi mês plui tart, ai 29 di Novembar dal 2010, il complès archivistic al è stât declarât di interès culturâl inte suaze dal decret legjislatîf 42/2004. La declarazion e ricognòs il valôr storic culturâl dal archivi e cuntune schirie di disposizions rigjidis al oblee il possessôr dal ben a garantî la conservazion e a rindilu disponibil par ducj. Par podê fâ i lavôrs di manutenzion straordenarie programade al CID, il materiâl de Caffaro al è stât metût inte sale dal Consei Comunâl, là che dal mês di Lui dal 2012 a son tacât i lavôrs par inventariâ i documents. Sul imprin e jere stade censide e catalogade dome une part dal font fotografic de bande dal Centri di catalogazion regjonâl di Vile Manin e a vuê a son disponibilis intal sît web dal Sisteme informatîf regjonâl dal patrimoni culturâl (www.sirfost-fvg-org) lis schedis di catalogazion di 3027 fotos.

In plui dal font fotografic, a vuê, l’archivi depositât inte sale dal Consei e cjape dentri ancje un font di elaborâts grafics, un font librari e altris materiâi.

Intal font fotografic a son conservâts cuasi doi mil negatîfs in lastre e cuasi mil e tresinte negatîfs in celuloide leâts ae ativitât dal studi Crimella-Aragozzini. Chest materiâl straordenari al dimostre e al documente i lavôrs di sistemazion agrarie, la costruzion de fabriche e dal paîs, lis distruzions de vuere e la ricostruzion intun timp che al va dal 1937 e al 1967. Une part dai negatîfs e descrîf la costruzion des centrâls di Midun e di cualchi stabiliment forest (SNIAFA e Coimbatore). Cun di plui si à ancje cualchi centenâr di negatîfs e di diapositivis che a descrivin i implants plui gnûfs, lis visitis des delegazions forestis e di personalitâts, e altris ativitâts davueltis jenfri il 1960 e il 2000. A son conservâts ancje cuasi siet mil positîfs racuelts ce in cartelis a teme, ce in scjatis par argoment. Intal font a son dentri ancje mil nûfcent cartulinis in blanc e neri suntune vincjine di sogjets diferents fotografâts in moments diferents (fabriche, paîs, pissinis, teatri, darsene e v.i.).

Il font dai elaborâts grafics, dividût in doi grups diferents, al cjape dentri dissens (ducj su cjarte lustre) che a vegnin dai archivis de SAICI-SNIA Viscosa. Il prin grup, fat di 175 taulis, al cjape dentri i dissens che a rivuardin i edificis civîi dal paîs e lis struturis architetonichis de fabriche. Intal secont grup di elaborâts grafics (747 taulis) a son particolârs tecnics (diagrams, schemis eletrics, mecanics e tubazions) des centrâls di Midun e dai implants clorosode, caprolactam, celulose e centrâl termoeletriche.

Il font librari al cjape dentri une vincjine di publicazions di epoche, diviers articui e la racuelte (cuasi complete) dal periodic aziendâl “Il nostro lavoro” che al è daûr a jessi digjitalizât par podêlu publicâ su internet. Di grues interès storic, dongje des version origjinâls di cualchi publicazion de SNIA Viscosa, a son un datiloscrit dal professôr Brusin e une copie dal Poema di Torre Viscosa di Filippo Tommaso Marinetti publicât de SNIA Viscosa intal 1938.

Tra i materiâi inventariâts che no si cognossevin ancjemò, e je di segnalâ une interessante prove di zes fate dal scultôr Romano Vio tant che studi pal monument a Marinotti logât sul prin jentrâ dal stabiliment.