Comun di Tor di Zuin / dal Tor (loc.)

Ricercje svelte


< vai al contenuto centrale




Font Biblioteche tecniche

Libris de biblioteche tecniche te cantine dal CID, situazion 2011

Vie pal mês di Jugn o vin cjatât intune cantine dal CID cualchi miâr di libris lassâts ae buine disore di cualchi bancâl. Intai mês di Lui e di Avost in gracie di cualchi fantat dal progjet “Estate diversa” e a doi lavoradôrs di utilitât sociâl, i libris a son stâts puartâts intun lûc sut, netâts dal polvar e inventariâts in struc.

I passe 5000 libris cjatâts inte cantine a rivuardin sei argoments di nature tecnologjiche sei argoments leâts aes produzions de SNIA Viscosa, ven a dî chimiche organiche e inorganiche, chimiche industriâl, eletrochimiche, metalurgjie, celulose, tratament des aghis, tratament dai refudums, energjie atomiche, laboratoris chimics, materiâi esplosîfs, combustibil pai missii, e v.i. Lis publicazions a vegnin fûr di diviers fonts: il materiâl plui impuartant al ven de biblioteche storiche de Bomprini Parodi Delfino di Colleferro (incuarpade de SNIA Viscosa intal 1968). La plui part des oparis e je dal periodi che al va dai agns Trente ai agns Sessante dal secul stât. Dut câs a son ancje libris de prime e de seconde metât dal secul XIX: tra chescj il plui antîc al è dal 1823. Di cetant interès pe storie dal Tor a son i rârs articui su Tor di Zuin, su (e di) Marinotti, su la SAICI, su la SNIA Viscosa e su lis citâts di fondazion dal Nûfcent.

Magari cussì no tant materiâl librari, similâr a chel a pene descrit par cualitât e par consistence, al è stât eliminât vie pai agns stâts, forsit par vie che si pensave che al fos superât.

I libris cjatâts a varan cumò di jessi catalogâts; un doman, chest materiâl impuartant al sarà, par ce che si pues, disponibil e consultabil.

Par tornâ a fâ sù la biblioteche storiche de SAICI – SNIA Viscosa, di cualchi mês si è daûr a tratâ cu la Universitât dal Friûl par puartâ di gnûf al Tor cualchi miâr di libris e di periodics su lis tecnologjiis di produzion de celulose che sul finî dai agns Novante a son stâts depositâts intune des bibliotechis de Universitât. Il materiâl nol è mai stât inventariât e al è restât fin a vuê intun dai magazens de Universitât.