Comun di Tor di Zuin / dal Tor (loc.)

Ricercje svelte


< vai al contenuto centrale




Fonts privâts

Font Bedon Schiozzi

Il font al è stât metût a disposizion de Aministrazion Comunâl de famee Bedon Schiozzi e al cjape dentri une schirie di positîfs, dai agns Cuarante, di grant interès storic fotografic e un bon numar di dissens tecnics. Framieç dai dissens e je ancje une interessante prospetive dal alt de centrâl termoeletriche. La plui part dai dissens e rapresente particolârs tecnics e tecnologjics dai implants industriâi de SAICI-SNIA Viscosa. Dopo di jessi inventariât, il materiâl al sarà digjitalizât par metilu a disposizion di ducj.

Font Franco Mauro

La famee Mauro, che fin a cualchi an indaûr e jere a stâ al Tor, e à un straordenari libri fotografic dal Jugn dal 1942. In graciis de disponibilitât dai parons, cheste publicazion e je stade scansionade e cumò e je disponibile in formât digjitâl. Lis fotografiis, i dissens a colôrs (tirâts jù tant che fotografiis intal volum) e lis didascaliis a descrivin cemût che si presentave il Tor tor de metât dal 1942. E ven mostrade la situazion industriâl e cemût che a van indenant i lavôrs agricui. Une imagjin a colôrs interessante e mostre il plan regoladôr dal 1942 cul stât di fat e chel di progjet. Intune descrizion scrite intes pagjinis dal volum si fevele dal cjamp dai presonîrs di vuere che al deventarà po il Villaggio Roma: a vuê, al è l’unic riferiment sul cjamp cjatât framieç dai documents de SAICI-SNIA Viscosa prime dai 8 di Setembar dal 1943.

Font Ghirardo

Cuindis agns indaûr intal ex teatri a son stâts fats lavôrs di manutenzion impuartants sul cuviert e sui sieraments. Dispès al sucêt, come in chest câs, che i lavôrs a vegnin seguîts sei di cui che al lavore, sei di personis curiosis o interessadis ae conservazion de struture. Intant dai lavôrs par sdrumâ part dal solâr un operari al à cjatât une cartele avonde strane fate sù intun gjornâl. Dentri dal pacut a jerin documents dai partigjans riferîts ae seconde metât dal 1944. Par fortune, l’operari al à pensât ben di consegnâ il materiâl a doi citadins che si vevin mostrâts une vore interessâts e che po lu àn tignût di cont. Si trate di uns cincuante pagjinis là che a son modui pes ricevudis cul bol dal CLN, manuscrits che a van dal Setembar al Otubar dal 1944 cu lis listis dai operaris che ducj i mês a devin un contribût al CLN, il program politic dal partît comunist e cualchi articul datiloscrit dal gjornâl l’Unità. La Aministrazion Comunâl, une volte savût dai documents, e à digjitalizât il materiâl cun chê di tignîlu di cont e rindilu disponibil su internet.