Comun di Tor di Zuin / dal Tor (loc.)

Ricercje svelte


< vai al contenuto centrale




Font Azienda agricola Torvis, Tor di Zuin: plan regolatôr, 1943

Font Azienda agricola Torvis

Dilunc de ricercje indreçade al recupar dai fonts archivistics, la scuvierte di chest font e je stade une des grandis sorpresis. La racuelte dai documents e cjape dentri ce che al reste de gjestion agricule de SAICI-SNIA Viscosa. L’archivi al è passât ae famee Ferruzzi intal 1981 e dal 1993 al è di proprietât de famee Andretta. In graciis di un acuardi cui proprietaris di vuê e dal impuartant contribût di doi lavoradôrs di utilitât publiche (LPU), o vin podût censî dut il materiâl grafic formât di uns 1800 dissens, cuasi la metât di grande impuartance storiche archivistiche, e lis planimetriis che a fasin viodi i plans regoladôrs dal 1943, dal 1947 e dal 1949. A son ancje i dissens di ducj i edificis de SAICI sparniçâts ator pal teritori comunâl e ancje i progjets di edificis che no son mai stâts fats sù (Tor di Zuin, Malisane, Gjalinace, Agjenzie 1, Campo, Presêt, Furgnei Disore e Disot, Banduts, Rodule Vecje, Agjenzie 5, Valete, Olmariis). Cun di plui a son dissens che a rivuardin la fabriche e la gleseute di Umkomaas e materiâi su la vile di Marinotti. Altris dissens – cence date, ma si stime che a sedin dal periodi jenfri la fin dai agns Cincuante e il principi dai agns Sessante – a rivuardin un pôcs di reperts archeologjics. Framieç dal centenâr di bustis su la gjestion aziendâl a son restadis ancje des cartelis di contrats par comprâ terens fats de SAICI-SNIA Viscosa jenfri il 1937 e il principi dai agns Cuarante.