Comun di Tor di Zuin / dal Tor (loc.)

Ricercje svelte


< vai al contenuto centrale




Archivis storics a Tor di Zuin

“Citât de autarchie e de celulose” al è il titul dal progjet che il Comun dal Tor al à proponût ae Union Europeane intal Novembar dal an 2009 te suaze dal program POR FESR dedicât ae archeologjie industriâl, progjet che al è stât fat bon e finanziât. Il progjet al à chê di valorizâ la grandiose documentazion archivistiche, grafiche e fotografiche che su la fondazion de citât – fabriche e sui siei prins agns di vite. Cun di plui, par tignî di cont la memorie documentâl e par dâ mût di lâ plui a fonts e par tornâ a lei cheste pagjine impuartante de storie, la Aministrazion Comunâl e je impegnade a cjapâ sù ancje altris archivis par inventariâju in maniere sistematiche e, cuant che al è pussibil, par digjitalizâju. Magari cussì no, dilunc vie dai agns, il patrimoni documentari al è lât daûr dal declin e des vicendis des societâts che a son vignudis dopo de SAICI. Tra la fin dai agns Setante e il prin tacâ dai Otante une vore di materiâl di archivi al è stât butât vie parcè che si lu calcolave intrigôs e di pôc interès. Intai câs plui fortunâts i materiâi che a son stâts tignûts di cont (plui di dut dissens) a son stâts sparniçâts e a son lâts a finî intai archivis des societâts che a son nassudis o che si son alternadis vie pai agns. Altris voltis il materiâl al è stât salvât parcè che al jere dismenteât intes cantinis o in archivis bandonâts e/o no acessibii.

La impuartance di conservâ il patrimoni documentari esistent e à puartat la Aministrazion Comunâl a cirî finanziaments di pueste che a permetessin di cjapâ sù, ordenâ e meti a disposizion di ducj i documents e lis informazions dai archivis. E je nassude cussì la idee dal progjet european, che dongje dal valorizâ i fonts archivistics e documentaris, al à chê di fâ cognossi i caratars particolârs dal Tor e de sô storie ancje par tirâ dongje students, ricercjadôrs e, parcè no, ancje turiscj. Il program POR FESR, là che al è dentri il nestri progjet, nol calcole tant che archeologjie industriâl dome lis struturis industriâls e i struments di produzion, ma ancje i archivis che a documentin lis ativitâts de industrie e dai siei lavoradôrs e al previôt di valorizâ no dome il ben, ma ancje dute la aree là che il ben al è insuazât intune logjiche di promozion culturâl e turistiche.

Pal Tor al è un obietîf une vore ambiziôs, che al ricognòs  inte documentazion primarie il fondamentâl pont di partence di ogni ricercje storiche. La bibliografie, ancje avonde vaste, dedicade al Tor e prodote vie pai agns tacant de sô fondazion dome da râr e à fat riferiment a lis fonts storichis primariis, soredut a chês archivistichis: lu dimostre il fat che la sezion storiche dal archivi comunâl prime dal 2012 no jere nancje mai stade ordenade.